အလုပ်ခွင်မှာ လုပ်သက်လည်း ကြာမြင့်လာပြီ၊ ကိုယ့်ရဲ့ ကိုယ်ရည်ကိုယ်သွေးနဲ့ အလုပ်အပေါ် အကျိုးပြုနိုင်စွမ်းကလည်း မြင့်တက်လာပြီဆိုရင် လုပ်ခလစာ တိုးမြှင့်ပြီး ရရှိသင့်တာ အမှန်ပါပဲ။ တကယ်လို့ အလုပ်ဌာနဘက်က ဒီအပိုင်းမှာ နှောင့်နှေးနေတယ်၊ ပျက်ကွယ်နေတယ် ဆိုရင်တော့ ကိုယ့်ဘက်က ရသင့်ရထိုက်တဲ့ လုပ်ခလစာကို တိုးမြှင့်ပေးဖို့ တောင်းဆိုရမှာပါ။ လုပ်ထုံးလုပ်နည်းအရ အဲဒီလို တောင်းဆိုတဲ့ အခါမှာ တရားဝင် စာတင်ပြီး အဆိုပြုဖို့ လိုပါတယ်။ လုပ်ခလစာ မြှင့်တင်ပေးဖို့ စာရေးသား တောင်းဆိုရာမှာ အလေးထား ထည့်သွင်းရမယ့် အကြောင်းအရာ ငါးခုကို ဖော်ပြပေးလိုက်ပါတယ်။

အခြေခံ ဆိုလိုရင်း
သက်ဆိုင်ရာ အထက်အရာရှိက ဒီစာကို ဖတ်မိတာနဲ့ လုပ်ခလစာ တိုးမြှင့် တောင်းခံထားတယ် ဆိုတာကို ရှင်းရှင်းလင်းလင်း မြင်သာသွားပါစေ။ ကိုယ့်ရဲ့နာမည်၊ ရာထူး၊ ကိုယ်စားပြု ဌာနတွေကို သေသေချာချာ ဖော်ပြဖို့ လိုပါတယ်။ ပြီးတော့ လုပ်ငန်းခွင်မှာ ပျော်ရွှင်မှု ရှိတဲ့တိုင် ကိုယ့်အတွက် လုပ်ခလစာ တိုးမြှင့် ရရှိသင့်ပြီလို့ ခံစားရတဲ့ အခြေခံ အချက်တွေကို ဖော်ပြသင့်ပါတယ်။

လစာတိုးတောင်းရတဲ့ အကြောင်းတရား
နိဒါန်းချီပြီးပြီဆိုရင် စာကိုယ် အပိုင်းမှာတော့ ကိုယ်ဘာကြောင့် လုပ်ခလစာ တိုးမြှင့်တောင်းဆိုရသလဲ ဆိုတာကို အကြောင်းပြချက် သေသေချာချာ ပေးသင့်ပါတယ်။ ကိုယ့်ရဲ့ တာဝန်ယူရမှု အပိုင်းတွေကို ရှင်းရှင်းလင်းလင်း ဖော်ပြပြီး လုပ်ခလစာ အနေနဲ့ လက်ရှိထက် ထိုက်တန်နေပြီ ဆိုတာမျိုးကို ပြေပြေပြစ်ပြစ် ရှင်းပြဖို့ လိုပါတယ်။ သင့်တော်တဲ့ ကာလ အတိုင်းအတာ တစ်ခုထိ ကြာမြင့်ပြီး ဖြစ်ပေမယ့် လုပ်ခလစာ မြှင့်တင်ချီးမြှင့်ဖို့ အလုပ်ဌာနဘက်က နှောင့်နှေးနေတယ် ဆိုရင်လည်း ဒီအချက်ကို ပီပီပြင်ပြင် ထောက်ပြရမှာပါ။

ထိုက်တန်ကြောင်း အကဲဖြတ်ခွင့်
လစာတိုးတောင်းရတဲ့ အကြောင်းရင်းတွေ ဖော်ပြပြီးရင်တော့ ကိုယ့်တောင်းဆိုမှုဟာ ထိုက်တန်ကြောင်း၊ သင့်တော်ကြောင်း၊ မှန်ကန်ကြောင်း ရှင်းပြဖို့ လိုပါတယ်။ ကိုယ်ယူရတဲ့ လုပ်ငန်း တာဝန်တွေ များမြောင်လာတာ၊ အလုပ်ခွင်ရဲ့ တောင်းဆိုမှုက ပြင်းထန်လာတာတွေ ရှိရင်လည်း သေချာ ရေးပြသင့်ပါတယ်။ ပြီးတော့ အလုပ်ခွင်မှာ ဖြတ်သန်း လုပ်ကိုင်ရင်း ကိုယ်ရည်ကိုယ်သွေးနဲ့ အတွေ့အကြုံပိုင်း တိုးတက်မှုတွေ ရှိလာတာကို မခြွင်းမချန် ထည့်ရေးရပါမယ်။ ကိုယ့်ကြောင့် အလုပ်ဌာနနဲ့ ကုမ္ပဏီအတွက် ဘယ်လိုဘယ်ပုံ ကောင်းကျိုးတွေ သက်ရောက်ခဲ့သလဲ ဆိုတာကို ရှင်းပြပါ။ တစ်ခုရှိတာက စာမှာ ထည့်ရေးသလို ကိုယ်တိုင်ကလည်း အမှန်တကယ် ဝန်ထမ်းကောင်း တစ်ယောက် ဖြစ်နေအောင် ရပ်တည်ဖို့တော့ လိုပါတယ်။

တိုးတောင်းလိုတဲ့ ပမာဏ
ကိုယ့်ရဲ့ တိုးမြှင့်ရရှိလိုတဲ့ လုပ်ခလစာ ပမာဏကို စာတစ်ပိုဒ်မှာ သီးသီးသန့်သန်နဲ့ ပြတ်ပြတ်သားသား ရေးပြထားသင့်ပါတယ်။ ဒါမှမဟုတ်လည်း ရာခိုင်နှုန်း အတိုင်းအတာနဲ့ပေါ့။ “ကျေးဇူးပြု၍ ကျွန်တော်/ကျွန်မရဲ့ လုပ်ခလစာကို လက်ရှိထက် ၅ ရာခိုင်နှုန်းလောက် မြှင့်တင်ပေးဖို့ စဉ်းစားပေးစေလိုကြောင်း အစီရင်ခံ တင်ပြအပ်ပါတယ်။ လက်ရှိ ထမ်းဆောင်နေတဲ့ လုပ်ငန်းတာဝန်တွေအရ လုပ်ခလစာ မြှင့်တင်မှုဟာ ထိုက်တန်တယ်လို့ ယုံကြည်ပါတယ်” ဆိုတာမျိုးပါ။

ညှိနှိုင်းဖို့ လမ်းဖွင့်ခြင်း
ကုမ္ပဏီက လုပ်ခလစာ မြှင့်တင်ပေးလိုပေမယ့် ကိုယ်တောင်းဆိုတဲ့ ပမာဏအတိုင်း ပေးချေဖို့ အကန့်အသတ်တွေ ရှိနေတယ် ဆိုပါစို့။ နှစ်ဦးနှစ်ဖက် အဆင်ပြေစေမယ့် ရှဉ့်လည်းလျှောက်သာ၊ ပျားလည်းစွဲသာ အနေအထားကို ကိုယ့်ဘက်က လမ်းဖွင့်ပေးထားသင့်ပါတယ်။ ကုမ္ပဏီရဲ့ ညှိနှိုင်း ဆွေးနွေးမှုကို ကြိုဆိုကြောင်း စာထဲမှာ ထည့်ရေးပါ။ သူဌေးက ကိုယ့်လုပ်ရည်ကိုင်ရည်ကို အသိအမှတ်ပြုပြီး လုပ်ခလစာ တိုးမြှင့်ပေးသင့်တယ်လို့ ယူဆပေမယ့် လောလောဆယ် အခြေအနေမှာ မဖြစ်နိုင်သေးကြောင်း ပြန်ကြားလာတယ် ဆိုပါစို့။ ဒါဆိုရင် သတ်မှတ်ကာလ တစ်ခုကို ညှိနှိုင်းယူပြီး စောင့်ဆိုင်းပေးတာမျိုးက အပြန်အလှန် ကောင်းကျိုး ရှိစေမှာ ဖြစ်ပါတယ်။